Велешанецот најверојатно се заразил со конго-кримска треска додека бил на риболов
Пациентот од Велес, кој е трет случај на конго-кримската треска можно е да се заразил додека бил на риболов. На денешната прес-конференција, директорката на Клиниката за инфективни болести и фебрилни состојби, д-р Милена Стевановиќ истакна дека пациентот има една рана која може да биде од крлеж, но тоа е заклучено индиректно и клинички, а самиот пациент не е свесен дека е каснат од крлеж. Како што информираше д-р Стевановиќ, неговата состојба е стабилна и се следи, а неговите контакти, вкупно девет, се лоцирани и се под медицински надзор.
– Во саботата вечер е донесен суспектен пациент за конго-кримска треска од велешката болница и во текот на ноќта е потврдена неговата дијагноза. Тој е во добра состојба, се жалел на покачена температура, главоболка, болка во мускулите и зглобовите, поради што и побарал лекарска помош. Лабораториските анализи беа со намалени тромбоцити во текот на вчерашниот ден, но со редовна супституција и комуникација денешните резултати се уредни. Но, не значи дека нема да имаме тек и развој на болеста. Пациентот е стабилен и се следи под лупа за сè што треба да се додаде во неговиот третман – изјави директорката на Инфективната клиника.
Како што појасни таа, можниот начин на зараза е рибарење покрај еден дел на Вардар каде што има влага, непроодна трева. Четири лица од неговото семејство се под медицински надзор, како и лекарите кои го третирале пациентот во велешката болница.
Епидемиолозите и Агенцијата за храна и ветеринарство се вклучени во следење на треската и се на терен, заловуваат инсекти и ги испитуваат. До вечерва очекуваме резултати, па Комисијата утре ќе ги разгледа сите поврзани детали – додаде д-р Стевановиќ.
Таа појасни и дека конго-кримската треска се пренесува преку крлеж. Може да биде пренесена и од консумирање на несоодветно или нетретирано млеко, месо од заразени животни.
Најчесто се пренесува кај здравствени работници, сточари, риболовци, ловџии, оние кои ги колат и обработуваат месните продукти на евентуално заболени животни. Овој пациент, свесно не дава податок дека забележал каснување од крлеж, што не мора секогаш да биде и забележана. Има една рана која може да биде од крлеж, но тоа го заклучуваме индиректно и клинички. Тој самиот не е свесен дека бил каснат од крлеж – појаснува директорката на болницата.
Д-р Милена Стевановиќ упати апел до луѓето кои се во природа, особено рибарите, ловџиите и планинарите – да носат високи чизми и чорапи, посветла облека за полесно да се забележат инсектите, а до здравствените работници апелираше да не го забораваат основниот редовен протокол за заштита при работа.
Болничарката која се зарази со конго-кримската треска е во стабилна состојба и не се очекуваат компликации. Претходно, 27 годишна девојка од штипското село Кучица почина по убод од крлеж.
Заразената болничарка се лекува со лекот Рибавирин, а како што информираше директорката на Клиниката за инфективни болести, д-р Милена Стевановиќ пациентката е во стабилна состојба и влегува во фаза во која се очекува појава на крварење или таканаречена хеморагична фаза.
Болничарката која се инфицираше со конго-кримска треска ќе се лекува со лекот Рибавирин