Најдобриот стрелец во историјата на Манчестер јунајтед, Вејн Руни, откри дека е глув на левото уво, што му создава проблеми во работата како стручен фудбалски коментатор.

Легендата на гигантот од „Олд Трафорд“ за првпат јавно проговори за здравствениот проблем за време на емисијата „Match of the Day“, објаснувајќи со какви потешкотии се соочува пред камерите.

Руни досега никогаш немал зборувано за состојбата, а не е познато ниту кога, ниту на кој начин го изгубил слухот на левото уво. Сè излезе на виделина за време на снимање за „Би-би-си“, кога тој побара од техничката екипа слушалката да му ја стават во десното уво.

„Може ли да ми ја ставите слушалката во ова уво?“, праша Руни, покажувајќи кон десното, по што додаде:

„Порано го исклучував повратниот канал, но проблемот е што сум глув на левото уво. Кога е премногу гласно, многу тешко ги слушам Кели Кејтс (водителката) или кој било друг што зборува од другата страна“.

Засега останува нејасно како и кога поранешниот капитен на Англија го изгубил слухот на левото уво, но неговото признание предизвика големо внимание во јавноста и меѓу навивачите.