Вардар со триумфот над Татран си го обезбеди првото место во СЕХА
Актуелниот шампион успеа да дојде до нов триумф во СЕХА лигата и да си го осигура првото место во групната фаза. Вардарци во последниот натпревар пред своите гледачи во 2019 година го победија Татран Прешов со 28:26 во натпревар во кој „црвено-црните“ покажаа две лица.
Гостинските ракометари беа подобар тим во првото полувреме кое го решија во своја корист со 13:17.
Во вториот дел на теренот доминираше Вардар кој прво со серија од 5:0 и осум минути без примен гол, успеа да ја анулира предноста на Татран, а во 41. минута да дојде и до првото водство на натпреварот (21:20). Оттогаш па се до крајот на средбата, вардарци ја имаа контролата врз играта, а единствено што успеаја да направат гостите беа да израмнат на пет минути до крајот (25:25). Одговорот дојде преку головите на Стилов и на Атман, но и на клучната одбрана на одличниот Гедбан за два гола предност во последната минута.Точка на натпреварот стави Дибиров за конечни 28:26.
Најпрецизни во редовите на Вардар беа Иван Чупиќ и Павел Атман со по пет гола, додека Калифа Гедбан имаше со осум одбрани.
Со победата, Вардар дојде до 24 бодови со кои го обезбеди првото место на табелата во групата А и ќе ја прескокне осминафиналната фаза во СЕХА Лигата. Последниот натпревар во 2019 година, вардарци ќе го играат во недела кога му гостуваат на Нексе
.