Денеска ракометарите на Вардар 1961 од 20.45 часот ќе го играат третиот натпревар од главната фаза во Лига Европа, а во СЦ „Јане Сандански“ доаѓа Бенфика од Португалија.

Бенфика славеше на домашен терен на 17 февруари против скопските „црвено-црни“ со резултат 40:35.

Играчите на тренерот Иван Чупиќ им се вратија на победите седум дена подоцна откако пред своите навивачи со 37:33 беа подобри од германскиот Мелсунген.

Македонскиот претставник со нова победа ќе биде поблиску до следната фаза, потсетување, првото место носи директен пласман во четвртфиналето, а втората и третата позиција носат плејоф.

Во групата 3, претходно од 18.45 часот во Шведска ќе играат екипите на Кристијанштад и Мелсунген.

Моментно на табелата Мелсунген има шест бодови, пред Бенфика и Вардар 1961 по четири, а два има Кристијанштад.

Составот на Вардар 1961 за денешниот меч против Бенфика: Фереира, Валах, Воркапиќ, Боно, Кеита, Митровиќ, Танкоски, Лазаревски, Марчинијак, Матиаба-Тузолана, Хориха, Анастасовски, Франциско да Силва, Малус, Пинто, Јанковски.

– Живееме само за овој натпревар. Не нè интересира што било, ниту што следи. Сакаме полн „Јане Сандански“ и да го покажеме нашето вистинско лице. Целта е секогаш иста – да се бориме на сите полиња и да играме со најдобрите. Сите мора да дадат нешто повеќе. Во Лига Европа мора да бидеме „300 на саат“. Нема луксуз, нема избор. Само работа, дисциплина и карактер – се зборовите на Чупиќ.