Имено, во последните метри во спринтот за победа во првата етапа се бореа Холанѓаните Дилан Гроневеген (Џамбо-Висма) и Фабио Јакобсен (Квикстеп). Во тие моменти Јакобсен се обиде да го претекне Гроневеген користејќи мал простор помеѓу него и заштитната ограда, но велосипедистот на Џамбо-Висма при брзина од 80 километри на час сакаше да го затвори просторот и го испружи лакотот што донесе катастрофални последици.

Јакобсен удри во заштитната ограда, направи салто во воздух и удри во судијата кој беше задолжен за фото-финиш.
Бидејќи заштитната ограда заврши на патеката, при поминување на целната линија паднаа уште неколку велосипедисти кои на крајот завршија во болница.

Поради валканиот потег Гроневеген е дисквалификуван од трката и му е одземена победата која му е доделена на Јакобсен но тоа е мала утеха за велосипедистот бидејќи се наоѓа во вештачка кома на одделението за интензивна нега во болницата во Катовице, а состојбата во последните часови му се влошила.

– Вистина е, неговиот живот е загрозен. Загуби многу крв и се здоби се бројни повреди на главата. Му ги ослободивме дишните патишта, срцето работи нормално, но сепак животот му е во опасност – изјави докторката Барбара Јершина.

Поради валканиот потег на Гроневеген своја истрага најави и меѓународната велосипедска федерација (УЦИ).

„Го осудуваме опасното однесување на Дилан Гроневеген кој го турна Фабио Јакобсен во заштитната ограда и предизвика масовен пад на велосипедистите. Ваквите испади се неприфатливи и ќе бараме сериозни казни“, стои во соопштението на УЦИ.

Според полските медиуми, сериозни повреди опасни по животот заработил и судијата на кој налета Јакобсен.