Маја Саздановска сподели емотивен спомен на својот сопруг Саша Лилчиќ, кој ненадејно почина пред речиси 12 години, во период кога нивната ќерка Срна беше многу мала.

Пејачката низ животот продолжи сама, секако со поддршка од најблиските, а загубата тешко ја преброди.

На својата инстаграм-приказна, Маја сподели фотографија што му ја испратила на сопругот пред 13 години, на неговиот фејсбук-профил. Станува збор за фотографија од графит на кој пишува „Те сакам“, а Саздановска ја објави со песната „Memories“ (во превод: спомени) од групата „Марун фајв“. Песната говори за минатото и воедно им оддава почит на оние кои повеќе не се со нас.

Во една прилика, Саздановска за естрадниот магазин „Бекстејџ“ изјави дека, сепак, времето не лечи сѐ.

„Велат дека времето лечи сѐ, но не е така. Едноставно се навикнуваш да живееш со болката. Срна беше многу мала кога почина маж ми, но секој ден прашува за него. Зборуваме и заеднички се потсетуваме на тато. За разлика од другите деца, поради тоа што се случи, созреа предвреме – многу е итра, снаодлива и личи на него. Тука се и бабите и дедовците да ѝ ги раскажуваат приказните за тато од неговото детство и младост. Не дозволуваме споменот да згасне“, рече Маја Саздановска.

Маја Саздановска и денес е активна на музичката сцена како придружен вокал на Калиопи. Во октомври минатата година, таа настапи на фестивалот Макфест заедно со Јован Јованов.