Турската „тикток-ифлуенсерка“ Мерве Черан предизвика ужасен насилен инцидент во ситуација која ја пренесуваше во живо на социјалната мрежа — таа се расправаше со жена на улица, а потоа ја нападна и ја избоде со нож, без воопшто да го прекине преносот, јавија турските медиуми.

На снимката се гледа како тиктокерката, позната како „Караѓул“, влегува во расправија со жената додека стрима, но ситуацијата брзо ескалира во брутално насилство на кое му сведочеле стотици луѓе вклучени на стримот. Додека трае стравичниот напад, гледачите продолжуваат да испраќаат стотици „лајкови“ и срциња, додека се слушаат минувачи-сведоци на насилството како врескаат, а ова на целата ситуација ѝ дава посебно морничав тон.

Во турската јавност инцидентот наиде на широк бран од негодување, засилен од фактот што „инфлуенсерката“ не го запрела стримот кога ситуацијата излезе од контрола.

Слични инциденти со насилство за време на преноси во живо на социјалните мрежи се случуваа и во минатите години.