Попова Шапка беше центарот на скијачките возбудувања на Балканот. Со врвни натпревари, импресивни настапи и несекојдневна атмосфера, 41. Шарпланински куп заврши на најдобар можен начин – со возбуда, спортски дух и многу адреналин.

На снежните падини на Шара, во динамичните слаломски трки, 37 учесници од девет различни држави се натпреваруваа за престижниот пехар, носејќи неизмерна енергија и страст кон спортот. Овој куп не е само натпревар – тој е симбол на традиција, посветеност и љубов кон скијањето.

На церемонијалното затворање, освен скијачката елита, присуствуваа и претставници од Министерството за спорт, Собранието и Општина Тетово, поддржувачи на настанот, како и љубители на зимските спортови, кои имаа чест да ги прослават успесите на најдобрите натпреварувачи.

– По 12 години пауза, со голема гордост го вративме најстариот меѓународен скијачки натпревар на Балканот – реномираниот Шарпланински куп. Овие два натпреварувачки дена донесоа возбудливи трки, одлични натпреварувачи од целиот регион и незаборавно спортско дружење. Неизмерна благодарност до сите спортски клубови, спортски работници и поддржувачи за нивната помош и придонес кон реализацијата на овој куп. Македонија уште еднаш докажа дека има капацитет да организира настан од ваков ранг, а ова е само почеток – со голема посветеност ја продолжуваме традицијата на Шарпланинскиот куп –  изјави Дејан Пановски, претседателот на Скијачката федерација на Македонија (СФМ).

Победници на 41 Шарпланински куп

Категорија жени:
1.Лирика Дева – Косово
2.Миа Паул – Бугарија
3.Ева Милевска – Македонија / Арба Папуци – Косово

Категорија мажи:
1. Константин Стоилов – Бугарија
2. Иван Главчев – Бугарија
3. Мирко Лазарески – Македонија / Марко Семерџиев – Бугарија

Скијачка федерација на Македонија уште еднаш изразува огромна благодарност до поддржувачите – Меѓународната скијачка федерација (FIS), Министерството за спорт, ски-центарот Попова Шапка, УНИ Банка, ПСС, МРТВ и Вертиго.