Украинскиот претседател Володимир Зеленски во понеделникот ја оцени својата турнеја низ земјите од Блискиот Исток како успешна и изјави дека биле постигнати или се разгледуваат повеќе договори за безбедносна соработка, објави „Ројтерс“.

„Тоа беше многу плодна посета на Блискиот Исток и регионот на Заливот. Веќе имаме историски договори со Саудиска Арабија, Обединетите Арапски Емирати и со Катар. Работиме и со Јордан и со Кувајт. Рустем Умеров моментално е во регионот и продолжува со политичките преговори на високо ниво, денес ми поднесе извештај, а веќе има и дополнителни барања од Бахреин и Оман. За Украина, ова не е само прашање на престиж и почит кон нашиот народ, ова е многу практично прашање. Ние ги извезуваме нашиот систем на заштита, вештините на нашите војници и знаењето што го поседува нашата држава. А од овие партнерски земји очекуваме возвратен безбедносен ангажман. Веќе се договоривме за можности за зајакнување на противвоздушната одбрана, за заеднички развој на одбранбеното производство и за енергетска соработка, вклучително и дизел и други клучни набавки што ни се потребни токму сега,“ напиша Зеленски во објава на социјалната мрежа „Икс“.

Долгата војна во Иран носи предност за Русија и ѝ штети на Украина, предупредува Зеленски

Катар и Украина постигнаа договор за одбранбена соработка, со кој ќе се овозможи размена на знаења и искуства во справувањето со закани од ракети и беспилотни летала. Договорот бил финализиран по средбата во Доха меѓу катарскиот емир шеик Тамим бин Хамад Ал Тани и украинскиот претседател Володимир Зеленски, во рамки на неговата  турнеја низ земјите од Персискиот Залив. Тоа е уште еден во низата договори што Киев ги постигна, по претходните договори со Саудиска Арабија и со Обединетите Арапски Емирати.

Според катарското Министерство за одбрана, двете страни разговарале за безбедносните состојби во регионот и за можностите за подлабока соработка, по што документот го потпишале високи воени претставници на двете земји. Договорот опфаќа и технолошка соработка, како и инвестиции во одбранбениот сектор.

Украина на овој начин настојува да им понуди помош на земјите од Заливот, користејќи го сопственото искуство од војната и развојот на дронската технологија, а паралелно се обидува да обезбеди и дополнителна поддршка од богати партнери во момент кога вниманието на САД е свртено кон други кризи.

Зеленски ја започна турнејата во регионот за да понуди украинско знаење и искуство за тоа како да се спротивстават на нападите со дронови што Иран ги користи во конфликтот со САД и Израел, кој се прошири низ Блискиот Исток.

Катар и Украина потпишаа договор за одбрана