Угина германскиот овчар Чемп, миленикот на семејството Бајден
Претседателот на САД, Џозеф Бајден и првата дама Џил Бајден соопштија дека нивниот домашен миленик, германскиот овчар Чемп угинал, пренесува Гласот на Америка.
„Со тага во срцата соопштуваме дека нашиот сакан германски овчар Чемп угина во мирот на својот дом. Беше наш постојан сопатник во последните 13 години, и беше обожуван од целото семејство“, се наведува во соопштението на семејството Бајден.
Во соопштението, исто така, се наведува дека здравјето на Чемп се влошило во последните неколку месеци, но и покрај тоа тој мафтал со опашката и му се умилкувал на секој кој ќе влезел во собата каде што престојувал.
„И во најсреќните и во најтажните денови, беше со нас и покажуваше разбирање за нашите чувства. Го сакаме своето драго и добро „момче“ кое засекогаш ќе ни недостасува“, наведуваат со своето соопштение Џозеф и Џил Бајден.
Во Белата куќа, заедно со семејството Бајден се веселија и нивните две домашни миленичиња, кучињата Чемп и Мејџор. Чемп беше дел од семејството уште од 2008 година, а Мејџор од 2018 година.