УЕФА не го менува планот: Шампионите на Јужна Америка и Европа ќе играат во Доха
Унијата на европските фудбалски асоцијации (УЕФА) и натаму планира Катар да биде домаќин на натпреварот Аргентина-Шпанија, познат како „Финалисима“, и покрај конфликтот на Блискиот Исток.
Препорачано
– Моментно не се разгледуваат алтернативни места. Конечната одлука се очекува до крајот на следната недела – соопшти УЕФА за натпреварот закажан за 27 март помеѓу актуелните јужноамерикански и европски шампиони.
Аргентина и Шпанија треба да играат на стадионот Лусаил, местото на епското финале на Светското првенство во 2022 година во кое Аргентина ја победи Франција на пенали.
– Во тек се разговори со локалните организатори кои вложија огромен напор натпреварот да биде успешен – соопшти УЕФА.
Доколку Доха се покаже како преголем безбедносен ризик, натпреварот би можел да се премести во Шпанија или на друго место во Европа, каде што играат речиси сите играчи од двата тима.
Последен пат, ваков натпревар, „Финалисима“, се одигра на Вембли во Лондон, Англија, во јуни 2022 година кога Аргентина ја победи Италија со 3:0.
