Утрово Министерството за внатрешни работи го уапси Артан Груби на граничниот премин Блаце при обид за влез од Косово. Информацијата за „Слободен печат“ ја потврдија од МВР.

Денеска (23.02.2026) во 06:10 часот на Граничниот премин Блаце, на влез во државата, од слобода е лишен Артан Груби (48), кој беше баран со меѓународна потерница за истрага за сторено кривично дело по чл.354 ст.5 в.в. ст.3 в.в ст.1 в.в со чл.22. од КЗ, велат оттаму.

Тој е приведен за кривично дело „проневера во службата“ во Државна Лотарија, каде заедно со Перпарим Бајрами се осомничени дека нарачале ВЛТ апарати и проневериле 8,2 милиони евра државни пари. За него Кривичниот суд од претходно има одредено мерка притвор во времетраење од 30 дена.

Откако во 2024 година ја напушти Македонија, за него беше распишана меѓународна потерница. Стејт Департментот на САД го стави Груби на црната листа заедно со судијата Енвер Беџети.