Јапонскиот суд прогласи за виновни тројца поранешни војници за сексуален напад на колешка. Добрата вест доаѓа откако Рина Гонои (24) предизвика негодување во јавноста и привлече меѓународно внимание кога ја објави својата приказна на Јутуб во 2022 година.

Обвинителите во Фукушима потоа покренаа обвиненија против тројцата мажи во март, менувајќи ја нивната претходна одлука. Јапонското општество се смета за длабоко конзервативно, каде што зборувањето против сексуалното насилство останува табу тема, пренесува Би-Би-Си.

Шутаро Шибуја, Акито Секине и Јусуке Кимезава добија условна казна од две години пред судот во Фукушима. Ова е прва голема пресуда за сексуален напад во Јапонија од јуни, кога земјата ги измени законите за сексуален криминал, што вклучуваше редефинирање на силувањето и зголемување на возраста за согласност.

Тоа беше резултат на долгогодишен активизам по серијата контроверзни судски пресуди со кои беа ослободени наводните напаѓачи. Активистите велат дека претходните закони често ги одвраќале преживеаните да зборуваат.

Во август 2021 година, тројца колеги ја силувале Гонои. Таа претходно изјави за Би-Би-Си дека додека во тоа време биле присутни околу десетина други колеги, никој не го спречил триото: „Многумина се смееја“. Гонои го пријавила инцидентот кај нејзините претпоставени, но нејзината жалба била отфрлена бидејќи не можела да добие сведочење од другите колеги.

Подоцна, тројцата мажи беа упатени под сомнение за непристоен напад од страна на полициската единица на Копнените сили за самоодбрана (ГСДФ), но случајот беше отфрлен поради недостиг на докази. Гонои на крајот ја напушти војската.

Нејзиното видео на Јутуб стана вирално минатата година и таа собра повеќе од 100.000 потписи за петиција со која го повикува Министерството за одбрана да го истражи нејзиниот случај. Министерството подоцна и се извини и започна ретка истрага за која официјалните лица рекоа дека откриле повеќе од 100 други поплаки за вознемирување низ Министерството.

Но, со публицитетот дојде и низа злоупотреби преку интернетот – па дури и смртни закани.

„Некои би рекле „ти си грда“, други би рекле „дали си всушност маж?” изјави таа за Би-Би-Си. „Кога собирав потписи за петицијата, добив заканувачки мејл во кој пишуваше „Ќе те убијам ако продолжиш понатаму“.

Таа додаде дека и пред инцидентот „на дневна основа“ доживувала сексуално вознемирување. Колегите правеле забелешки за нејзиното тело и ја допирале додека другите гледале. Гонои, исто така, поднесе граѓанска тужба против петмината сторители и јапонската влада, барајќи 5,5 милиони јени отштета од мажите за предизвикување на нејзината ментална вознемиреност и дополнителни 2 милиони јени од државата за нејзиниот неуспех за да се спречи злоупотреба.