Тренерот на Севиља, Матијас Алмеида, се соочи со историска казна во Ла Лига, откако дисциплинските органи му изрекоа суспензија од дури седум натпревари што е највисока досега во историјата на најсилната шпанска лига.

Инцидентот се случи во финишот од дуелот против Гетафе, кој заврши 1-1. Во 85. минута, темпераментниот Аргентинец бурно реагираше кон главниот судија Матијас Хесус, по што заработи директен црвен картон.

Според извештајот, причините за драконската казна се повеќекратни, жестоки протести, навредливи зборови, несоодветно однесување и шутирање на топката во знак на револт.

Од клубот експресно реагираа со соопштение во кое му дадоа целосна поддршка на својот стратег и најавија жалба на одлуката, со надеж дека казната ќе биде намалена.

Доколку санкцијата остане на сила, Алмеида ќе може повторно да седне на клупата дури на 22 април, кога Севиља ќе се соочи со Леванте.