Рејтингот на одобрување на американскиот претседател Доналд Трамп на крајот од 2025 година е помал отколку во истиот период од неговиот прв мандат, како и во споредба со поранешниот американски претседател Џозеф Бајден, според најновата анкета спроведена од „Економист“ и „ЈуГов“.

Според анкетата, Трамп бил поддржан од 39 проценти од испитаниците на крајот на декември, додека 56 проценти не го одобрувале, што претставува нето рејтинг од минус 17 поени, објави „Форбс“, додавајќи дека ова е за три поени пониско отколку во исто време за време на неговиот прв мандат и за седум поени послабо во споредба со Бајден по неговата прва година на функцијата.

Анкетите покажуваат дека ставовите за состојбата на економијата се клучен фактор во падот на популарноста на Трамп.

Повеќе од половина од анкетираните, 51 процент, веруваат дека американската економија се влошува, а неговиот рејтинг на одобрување за управувањето со економијата паднал на 36 проценти, најниско ниво во двата негови мандати.

Според Галуп, просечниот рејтинг на одобрување на Трамп за време на неговиот втор мандат е 41 процент, исто како и за време на неговиот прв, најнизок просечен рејтинг на кој било американски претседател од времето на Хари Труман.

Во обид да го поправи својот имиџ, Трамп овој месец започна турнеја за трошоците за живот откако републиканците претрпеа порази на изборите во ноември, што аналитичарите го сметаа за критика на неговите економски политики.

Падот на популарноста беше забележан и по воведувањето на широки царини за стоки од речиси сите трговски партнери на САД, како и поради контроверзни потези како што се намалувањето на федералната администрација и зголемувањето на депортациите, кои предизвикаа правни спорови и јавни критики, пренесува Танјуг.

Анкетите, исто така, покажуваат слабеење на поддршката во рамките на Републиканската партија, како и меѓу белите гласачи со високо ниво на образование, додека демократите во моментов имаат мала предност пред следните среднорочни избори.