Трамп: Градам една од најголемите и најубавите балски сали во светот
Откако го сруши Источното крило на Белата куќа, Доналд Трамп вели дека сега е „премногу доцна“ да се запре изградбата на огромната балска сала за која сонува да ја изгради таму, по тужбата поднесена од Националниот фонд, организацијата што го брани националното наследство, пренесува Њујорк тајмс.
Препорачано
„Јас градам, покрај сè друго што правам, една од најголемите и најубавите балски сали во светот“, напиша Трамп денес на Трут сошал и додаде: „ Премногу е доцна“ за да се запре работата на овој „подарок за Соединетите Држави“.
Во петокот, претставници на Министерството за правда му рекоа на судот што ја сослушуваше тужбата од Националниот фонд за зачувување на историските споменици (NTHP) дека плановите за салата сè уште можат да се променат.
„Да се запре работата во оваа напредна фаза, кога толку многу работи веќе се нарачани и завршени, би било катастрофално за Белата куќа, нашата земја и сите засегнати страни“, напиша Трамп.
Во октомври, Трамп нареди да се сруши Источното крило за да се направи место за балска сала со 1.000 седишта за приеми и формални вечери.
Националниот фонд поднесе тужба во декември, тврдејќи дека владата на САД не ги исполнила законските услови за преглед и не добила конгресна дозвола за проектот.
„Таков значаен подарок за Соединетите Американски Држави речиси сите го сметаат за нешто прекрасно. Но, не, како и обично, ме прогонува, овој пат од крајно левичарскиот Национален (не!) фонд за зачувување на историските споменици, организација која рутински се потсмева на нашата земја“, напиша Трамп на Трут сошал.
Националниот фонд за зачувување на историските споменици е непрофитната организација задолжена од Конгресот за заштита на историските градби.
„На таканаречените „шампиони за зачувување“ (…) не смее да им се дозволи да го блокираат ова очајно потребно проширување на нашата голема Бела куќа, место за кое еден претседател никогаш немал потреба од дозвола за да го промени или подобри“, напиша Трамп.
ВИДЕО | Трамп урна половина од Белата куќа заради балската сала, покажуваат сателитските снимки
