Американските и нигериските сили, го убиле вториот по команда глобален лидер на Испламска држава Абу Билал ал Минуки, информираше претседателот на САД Доналд Трамп.

-Вечерва, под моја директива, храбрите американски сили и вооружените сили на Нигерија беспрекорно извршија прецизно испланирана и многу сложена мисија за елиминирање на најактивниот терорист во светот од бојното поле. Абу-Билал ал-Минуки, втор по команда на ИСИС на глобално ниво, мислеше дека може да се скрие во Африка, но малку знаеше дека имаме извори кои нè информираат за тоа што прави. напиша американскиот претседател на својата платформа Truth Social.

Како висок командант во рамките на Исламската држава, Западноафриканската провинција (ISWAP) тој играше важна улога во координирањето на меѓународното финансирање, комуникацијата и стратешкото водство за екстремистичките мрежи што работат во Африка.

Поради неговата наводна вмешаност во глобални терористички активности, американскиот Стејт департмент официјално го означи Ал-Минуки како „специјално означен глобален терорист“ (SDGT-Specially Designated Global Terrorist) во американскиот федерален регистар во јуни 2023 година.

-Тој повеќе нема да може да ги тероризира луѓето од Африка, ниту да помага во планирањето операции насочени кон Американците. Со неговото отстранување, глобалната операција на ИСИС е значително намалена, напиша Трамп.

Трамп ѝ се заблагодари на владата на Нигерија за нејзиното партнерство во операцијата, иако не откри точно каде се случила.

Трамп претходно ја обвини Нигерија дека не ги заштитува христијаните од исламистичките милитанти на северозапад.

Нигерија негира дека дискриминира која било религија, велејќи дека нејзините безбедносни сили ги таргетираат вооружените групи кои напаѓаат и христијани и муслимани.

САД извршија напади насочени кон милитанти поврзани со Исламска држава во Нигерија во декември. Оттогаш, Вашингтон распореди беспилотни летала и 200 војници за да обезбеди обука и разузнавачка поддршка на нигериската војска против бунтовите поврзани со Исламска држава и Ал Каеда кои се шират низ Западна Африка.