Претседателот на САД, Доналд Трамп, во изјава пред јавноста рече дека тој одбива да носи маска за време на пандемија на коронавирусот.

Во петокот вечерта Трамп ги откри новите федерални мерки во Америка, вклучително и препораката сите во јавноста да носат маска за лице, пренесува АП. Патем, Америка е на првото место по бројот на заразени – 277.467, по што следат Италија со 119.827 и Шпанија со 119.199 лица.

Веднаш по презентирањето на препораките за маските, Трамп посочи дека тој „нема намера“ да го стори тоа.

Центарот за контрола и превенција на болести (ЦДЦ) препорачува Американците во најтешко погодените околини да носат нешто над нивните лица, било да е тоа маица, шамија или нехируршка маска.

„Тоа е препорака и избирам да не ја почитувам. Не сакам да носам маска“, рече тој.

Трамп појасни дека „не може да се замисли себеси“ со маска, како седи во Овалната канцеларија и ги поздравува светските лидери.

„Кога се поздравувам со претседатели на други држави, премиери, диктатори, кралеви, кралици…Едноставно не се гледам во тоа“ објаснил Трамп.

Американскиот претседател вчера потпиша одредба со која и` нареди на својата администрација да го прекине извозот на маски за лице Н-95 и останати лични заштитни опреми во други земји.