И покрај откажувањето на манифестацијата „Голачки фолклорни средби”, манастирот „Св.Пантелејмон” и годинава е зборното место на делчевци, виничани и жителите на останатите места кои секоја година во чест на народниот исцелител ја посетуваат планината Голак.

Манастирот кој се наоѓа под врвот Мала Чавка и годинава граѓаните како што рекоа го посетија за свое и здравје на своите најблиски.

-Ова е православна традиција, иако без културно-уметничка порграма дојдовме во чест на „Св.Петка” и го посетивме овој манастир во чест на утрешниот празник „Св.Пантелелејмон”.Од Тработивиште сме и доаѓаме секоја година овде да ја одбележиме православната традиција. Нека е на помош празникот на сите, истакна жителка на село Тработивиште која вечерва го посети манастирот на Голак.

Свештеникот Васко Шонтевски рече дека за време на посетата на манастирот се почитуваат мерките за заштита од КОВИД-19.

-Иако сега сме во ситуација кога имаме пандемија, традицијата која е позната за христијанската вера продолжува овде на Голак каде луѓето преспиваат. Така било отсекогаш по божја воља, тоа е празник за сите оние кои имаат мака да се излечат, бидејки се смета дека Пантелејмон ги лекувал луѓето, истакна Шонтевски.

Меѓу присутните на Голак имаше посетители и од блиските села.

– Од Драгобраште сме, овде по традиција славиме на Голак. Малку е ладно и поради тоа нема да преспиеме, но ќе поседиме некое време и ќе го одбележиме денот – истакнаа посетители од виничкото село Драгобраште.

На пат кон Голак, но и на самата планина беа забележливи возила на делчевската полиција кои како дел од мерките за заштита од коронавирусот дозволуваа ограничено присуство на посетители.