Тетовските пожарникари реагирале исклучително брзо, екипи биле пратени и од Скопје
Повеќе од 30 пожарникари од единицата од Тетово интервенираа синоќа со пет возила и за 15 минути го локализираа, а за четириесет минути го изгаснаа пожарот што избувна во модуларната болница во Тетово.
На тетовските пожарникари од Скопје веднаш на помош им биле испратени три екипи од Противпожарната единица, но како што не информираа оттаму утрово, кога пристигнале пожарот бил веќе згаснат.
Во моментов е поставена дежурна противпожарна екипа со едно возило на местото на опожарената модуларна болница, информираат од ППЕ Тетово.
Модуларната болница во Тетово е целосно изгорена. Имаше капацитет од 35 кревети.
Заменик-командирот на тетовската противпожарна единица, Сашо Трајчевски, ноќеска изјави дека пламените јазици биле огромни, а од болницата се ваделе и жртви. Утрово ова не ни беше потврдено од тетовската ППЕ туку нѐ упатија да ги сочекаме официјалните податоци.
Официјални податоци треба да дадат двајца скопски и тројца тетовски обвинители вршат увид на лице место, а Владата итно ќе заседава во 10 часот.