Францускиот носач на авиони со нуклеарен погон „Шарл де Гол“ плови кон Ормускиот теснец како подготовка за можна одбранбена мисија насочена кон повторно воспоставување безбедна пловидба, објави Ројтерс.

Француското Министерство за вооружени сили во среда објави дека носачот го поминал Суецкиот канал и влегол во Црвеното Море. Тој стратешки воден пат е блокиран поради војната меѓу САД, Израел и Иран.

Иницијативата за воспоставување мултинационална мисија ја водат францускиот претседател Емануел Макрон и британскиот премиер Кир Стармер. Тие нагласија дека операцијата ќе биде исклучиво од одбранбен карактер и дека ќе биде започната дури по завршувањето на сегашните воени конфликти. Главната цел е враќање на слободата на пловидба во теснецот.

Пред почетокот на војната, Ормускиот Теснец беше еден од најважните поморски патишта во светот. Приближно 20 проценти од вкупната светска трговија со нафта минуваше низ него, што ја потврдува неговата исклучителна економска и енергетска важност.

Францускиот министер за надворешни работи Жан-Ноел Баро изјави дека Франција нема да ги укине санкциите врз Иран сè додека нејзините вооружени сили го држат блокиран Ормускиот Теснец. Во изјава за француската телевизија РТЛ, Баро отфрли каква било можност за ублажување на санкциите во сегашните околности, пишува Ал Џезира.

„Ние самите воведовме значителни санкции врз Иран. Сепак, секоја можност за укинување на какви било санкции е исклучена сè додека Ормускиот Теснец е блокиран. Не смее да биде блокиран, не смее да се наплаќа за премин, ниту пак смее да се користи како средство за притисок или уцена“, рече Баро и ја нагласи стратешката важност на теснецот.

ВИДЕО | Иран испука балистички проектил: „Ормускиот Теснец мора да остане во наши раце“ – Слободен печат

Во меѓувреме, Иранската револуционерна гарда (ИРГЦ) испали балистички проектили од рамна и целосно незаштитена локација. Иран испрати предупредување дека „нема со никого да преговара за нуклеарното прашање“ и дека „контролата над Ормускиот Теснец мора да остане во ирански раце“.