Најмалку 12 лица се убиени, а голем број се ранети во денешниот попладневен самоубиствен бомбашки напад во сомалискиот град Галкајо, соопшти полицијата, пренесе ДПА.

Меѓу убиените се и двајца високи позиционирани сомалиски воени команданти, кои биле истурени во борбата против терористичката група Ал-Шабаб, изјави за ДПА Абдулахи Ахмед.

-Навистина е многу, многу страшно. Изгубивме двајца од нашите најискусни воени команданти во сомалиската армија, рече тој.

Меѓу жртвите имало и цивили, додаде полицијата, пренесува германската агенција.

Ал Шабаб, преку своето радио Андалус, ја презеде одговорноста за нападот, соопштувајќи  дека во него се убиени 20 лица.

Нападот се случи во близина на стадион каде луѓе се собираа да го пречекаат сомалискиот премиер Мохамед Хусеин Робле, кој во последните четири дена беше на турнеја низ регионот.

Портпаролот на сомалиската Влада, Исмаел Мухтар Омар, изјави за ДПА дека бројот на жртвите може да се зголеми.

Извор.МИА