Околу 700 луѓе се убиени во тридневните протести поради изборите во Танзанија, соопшти главната опозициска партија. Протестите избувнаа во среда, на денот на изборите, поради, како што велат демонстрантите, систематско задушување на опозицијата и исклучување на клучните кандидати од претседателските избори, објави „Гардијан“ .

Џон Китока, портпарол на опозициската партија Чадема, за агенцијата Франс Прес (АФП) изјави дека стотици луѓе се убиени од среда.

„Додека зборуваме, бројот на жртви во Дар ес Салам е околу 350, а во Мванза над 200. Ако на тоа ги додадеме бројките од други места низ земјата, вкупниот број е околу 700“, рече тој. Тој додаде дека бројот на жртви би можел да биде значително поголем бидејќи убиствата може да се случуваат за време на ноќниот полициски час.

🔸#Tanzania is burning.

We need new leaders.🇿🇼🇹🇿 pic.twitter.com/60EXeJqnMa

— Fadzayi Mahere🇿🇼 (@advocatemahere) October 31, 2025

Неименуван безбедносен извор потврди за АФП дека има извештаи за повеќе од 500 мртви, „можеби 700-800 низ целата земја“. Амнести интернешнл соопшти дека добила информации за најмалку 100 убиени.

Китока објасни дека бројките на партијата Чадема биле собрани преку мрежа на членови кои ги посетувале болниците и здравствените клиники и „броеле мртви тела“.

Тој побара од владата да „престане да ги убива нашите демонстранти“ и повика на формирање преодна влада што ќе го отвори патот за слободни и фер избори.

„Стоп на полициската бруталност. Почитувајте ја волјата на народот, а тоа е изборна правда“, рече Китока.

Танзанијците излегоа на гласање во среда на гласање на кое се очекуваше претседателката Самија Сулуху Хасан да ја консолидира својата власт во услови на растечка репресија и исклучување на клучните противници од претседателската трка. Во април, Тунду Лису, потпретседателот на Чадема, беше уапсен и обвинет за предавство и киберкриминал, а неговата партија подоцна беше дисквалификувана од учество.

Минатиот месец, Лухага Мпина, лидер на друга опозициска партија, ACT-Wazalendo, исто така беше дисквалификуван, оставајќи го Хасан во трката само со помалку познати противници од помалите партии. Во периодот пред изборите, исто така, беа забележани апсења и киднапирања на критичари на владата.

Од средата, големи групи демонстранти се судрија со полицијата и уништија имот поврзан со владејачката партија. Демонстрациите беа центрирани во пристанишниот град Дар ес Салам, но оттогаш се проширија низ целата земја.