Повеќе од 3.500 луѓе умираат секој ден од вирусот на хепатитис, предупреди Светската здравствена организација (СЗО), повикувајќи на одлучна и брза акција во борбата против вториот најголем убиец меѓу заразните болести.

Новите податоци од 187 земји покажаа дека бројот на смртни случаи од вирусен хепатитис се искачил на 1,3 милиони во 2022 година, што е за 200.000 повеќе од три години порано, според извештајот на СЗО објавен заедно со Светскиот самит за хепатитис, кој оваа недела се одржува во Португалија.

– Ова се алармантни трендови – изјавила на прес-конференција Мег Доерти, водителка на глобалните програми на СЗО за ХИВ, хепатитис и сексуално преносливи инфекции.

Меѓу починатите од хепатитис, 83 отсто подлегнале на хепатитис Б, а 17 отсто на хепатитис Ц.

Постојат делотворни и евтини генерички лекови кои можат да ги лекуваат.

Сепак, само три отсто од оние со хроничен хепатитис Б примиле антивирусна терапија до крајот на 2022 година, се наведува во извештајот.

Само 20 отсто или 12,5 милиони луѓе биле лекувани од хепатитис Ц.

– Овие резултати се далеку под глобалните цели до 2030 година за лекување на 80 отсто од сите заболени кои живеат со хроничен хепатитис Б и Ц – рекла Доерти.

Шефот на СЗО, Тедрос Аданом Гебрејесус, нагласи дека податоците од извештајот се загрижувачки.

– Иако бројот на инфекции паѓа на глобално ниво, смртноста расте, бидејќи премалку луѓе заболени од хепатитис се дијагностицираат и лекуваат – рекол тој.

На Африка отпаѓаат 63 отсто од новите инфекции со хепатитис Б, а покрај тоа, таму се вакцинираат помалку од 20 отсто од новородените бебиња, се наведува во извештајот.

СЗО истакнува и дека погодените земји немаат доволен пристап до генеричките лекови за лекување и често плаќаат за нив повеќе отколку што треба.

Според извештајот, две третини од сите случаи на хепатитис се регистрирани во Бангладеш, Кина, Етиопија, Индија, Индонезија, Нигерија, Пакистан, Филипини, Русија и Виетнам.

– Универзалниот пристап кон превенција, дијагноза и лекување во тие 10 земји до 2025 година е клучно за да се врати глобалниот одговор на хепатитисот на вистинскиот пат, со зголемени напори во африканскиот регион – се наведува во соопштението на СЗО.

Вирусниот хепатитис е втор најголем убиец меѓу заразните болести, веднаш по туберкулозата.