Судот во Париз ја потврди пресудата на Марин Ле Пен за злоупотреба на средствата од ЕУ, но ја скрати нејзината забрана за кандидирање за јавни функции, теоретски зачувувајќи го патот за лидерката на крајната десница да се кандидира на претседателските избори во 2027 година, пишува „Еуроњуз“.

Детали за новата пресуда

Сепак, судот ја осуди и Ле Пен на тригодишна затворска казна: две условни и една со електронска алка на глуждот. Ова би ја отежнало претседателската кампања политички и логистички и фрла сомнеж врз тоа дали таа всушност ќе продолжи да се стреми кон највисоката функција во Франција.

Минатогодишната првостепена пресуда ја прогласи Ле Пен, заедно со 24 поранешни европски претставници, асистенти и сметководители и самата партија, за виновна за водење систем на проневера.

Тие беа обвинети дека ги користеле средствата на Европскиот парламент за вработување на персоналот на Националното собрание во Франција од 2004 до 2016 година. Во тоа време, таа беше осудена на петгодишна забрана за вршење јавна функција и четири години затвор, од кои две беа условни, по што таа поднесе жалба со уште десет други обвинети.

Ставовите на одбраната и обвинителството

Ле Пен го нарече процесот „лов на вештерки“, а некои од нејзините поддржувачи испратија смртни закани до судиите. За време на жалбената постапка, таа негираше дека нејзината партија има систем за проневера на средствата на Европскиот парламент, тврдејќи дека партијата дејствувала „со целосна добра намера“.

Од друга страна, обвинителите инсистираа на тврдењето дека таа го „професионализирала“ начинот на пренасочување на средствата на ЕУ. Тие изјавија дека системот бил случајно воведен од нејзиниот покоен татко и коосновач на партијата Жан-Мари Ле Пен, а таа го подобрила откако ја презела функцијата од него во 2011 година.

Ѝ гори под нозете на Марин Ле Пен: политичарката почнува правна битка за да си ја спаси кандидатурата во 2027 година