Конфликтот од Нагорни Карабах меѓу Азербејџан и Ерменија се проширува на некој начин и на француската територија. Бројната ерменска заедница во Франција на неколку пати организираше блокади на автопатите, но последната направена утрово на автопатот А7 во двата правци во Виен (Изер) доведе до судир меѓу проеременски и протурските активисти.

Според локални медиуми, повреден е 23-годишен маж кој бил евакуиран во релативно вонредна состојба во болницата во Виен, според радиото „Франс Бле Изер“. Регионалниот дневен весник „Дофине либере“ известува за четворица повредени.

Сепак, состојбата во сообраќајот се врати во нормала по заминување на демонстрантите.

Демонстрант, претставувајќи се како Артур, претходно објасни дека овој митинг е мотивиран од стравот дека во Ерменија се случува „втор геноцид”. Тој го проценил бројот на демонстранти на самото место помеѓу 300 и 400 лица.

– Ние сакаме да престане нападот. Ние сакаме мир. Ние сме три милиони во Ерменија и ние се бориме против три земји, Турција, Азербејџан и Сирија. Да не ги спомнувам Израелците кои ги обезбедуваат беспилотните летала што се користат за бомбардирање на ерменските позиции, истакна демонстрантот Артур, додека другите зад него скандираа „Признавање!”.

Ерменската заедница бара признавање на сепаратистичката енклава Нагорно Карабах (или Арачах), населена со Ерменци, но официјално дел од Азербејџан.