Во Брашов, Романија се одржува Меѓународниот стрип салон, а меѓу учесниците е и средношколката Анастасија Недељковска од Куманово која учи во средното уметничко училиште „Лазар Личеноски“ во Скопје. Нејзиниот стрип е во голема конкуренција да биде избран и изложен во официјалниот каталог.

Нејзиното излагање во Романија е врз основа на соработката почната преку проектот „Can for Balkan“ на кој со свои стрипови учествуваат повеќе македонски автори, информираше Томе Трајков, програмски координатор на Стрип-центарот на Македонија со седиште во Велес.

Трајков од СЦМ-Велес посочи дека историскиот стрип како тема е доста развиен и популарен и има континуитет во Романија.

За оваа година беше објавен меѓународен конкурс за контрафактуален стрип, што може да се преведе како испревртена историја или слободно речено – „што би било кога би било“, рече Трајков.

Недељковска активно учествува на стрип натпревари и изложби од 2019 година и е дел од македонската младинска стрип сцена. На Стрип фестивалот во Брашов покрај изложбата ќе има и едукативни работилници, промоции и придружни активности.