Вицепремиерот за европски прашања Никола Димитров, попладнево ја заокружи својата посета на Брисел со средба со потпретседателот на Европската Комисија, Маргаритис Схинас, задолжен, меѓу другото за миграциските прашања.

На средбата, како што соопштија од неговиот кабинет, станало збор за важноста на мисијата Фронтекс “во овие моменти кога се реактуелизира прашањето на миграцијата”.

Потпретседателот Схинас, велат оттаму, изразил силна поддршка за евроинтегративниот процес на Северна Македонија, како и подготвеност за поддршка од неговиот тим во областите од неговата надлежност.

Схинас од своја страна изрази задоволство за средбата со Димитров преку Твитер.

-Добредојде за Никола Димитров во Европската Комисија за прв пат откако е на позиција на вицепремиер за европски прашања, разговаравме за нашите утрешни предлози за миграција, соработката со западниот Балкан и патот на Северна Македонија кон ЕУ, напиша Схинас на Твитер.

Утре Европската Комисија треба да го презентира својот предлог за реформа на системот на азил и миграција на ЕУ.