Комитетот на Претставничкиот дом на САД, кој го истражува упадот во Капитол Хил на 6-ти јануари, едногласно ги поддржа обвинувањата против поранешниот советник во Белата куќа, Стив Бенон, за непочитување на Конгресот.

Бенон, познат и како „спин -доктор“ на Трамп, претходно беше повикан да сведочи, но тој одби, што Комитетот го оцени како шокантно во својата одлука.

Одлуката на комитетот го отвора патот за целиот Претставнички дом да се изјасни за тоа, а потоа се проследува до Министерството за правда, кое ќе одлучи дали ќе поднесе обвинение. Гласањето во Претставничкиот дом е закажано за во четврток.

Доколку биде прогласен за виновен, Бенон може да се соочи со парична казна и до една година затвор, пренесува Би-Би-Си.

Во извештајот од понеделникот, комитетот тврди дека Бенон дал изјави што укажуваат дека однапред знаел за „екстремните настани“ на 6-ти јануари, кога Конгресот требаше да го потврди демократот Џо Бајден за победник на претседателските избори.

Исто така, беа забележани сите начини на кои Бенон учествуваше во настаните што доведоа до востанието, вклучувајќи ги и извештаите дека го охрабрил Трамп да се фокусира на 6-ти јануари, денот на потврдувањето на изборните гласови, и коментарите од 5-ти јануари дека „целосен хаос ќе следува“ следниот ден.

Трамп во понеделникот ја тужеше конгресната комисија, тврдејќи дека нејзините членови незаконски побарале информации од Белата куќа, а во тужбата поднесена до судот во Вашингтон се наведува дека материјалот што го побарал е покриен со правна доктрина позната како „извршна привилегија“, која штити доверливост на одредена комуникација во Белата куќа.

Трамп ја поднесе тужбата откако претседателот Бајден одлучи да се откаже од правото да го блокира доставувањето на документи до Конгресот, право што му дава „извршна привилегија“.

Администрацијата на Бајден изјави дека насилната опсада на Капитол Хил пред повеќе од девет месеци е толку екстремен настан што заслужува откажување од привилегијата што обично ги штити комуникациите на Белата куќа.