Во рамките на секојдневните активности на СДСМ под мотото „Рамо до рамо до победа“ денеска симпатизерите од скопската општина Аеродром ги посетија Оливер Спасовски и Мелиса Ценоска Серафимовска, а средби со граѓаните во Зелениково оствари портпаролката на владејачката партија, Богданка Кузеска.

Спасовски пред членовите и поддржувачите на СДСМ во Аеродром рече дека партијата има направено најмногу за исполнување на стратешките цели на државата, „со државнички и одговорни политики ја внесе земјата во полноправно членство во НАТО, а ги започна и преговорите со ЕУ, со заштитен и потврден македонски јазик и идентитет“.

„Сега во македонското Собрание е моментот за одлука, да се продолжи по европскиот пат, до целосна интеграција во ЕУ, како држава и како народ имаме историска шанса која што треба да ја зграпчиме. Сите политички субјекти имаат обврска и одговорност да се приклучат на процесот што ја обезбедува нашата европска иднина. Се наоѓаме на крстосница меѓу интеграција и изолација. Пораките ЕУ и нашиот стратешки партнер САД се јасни и недвосмислени, треба да се искористи геополитичкиот момент на согласноста на земјите членки на ЕУ за проширување, сега е моментот кога треба да ги донесеме потребните одлуки за европска иднина на државата, за иднината на државата, за сегашните и за идните генерации“, порача Спасовски.