Францускиот институт во Скопје и Кинотеката организираат нова проекција на месечните „Кино-средби“, во рамките на кои се прикажуваат современи француски филмови.

Во четврток, 28 мај, во 20 часот, во Кинотеката ќе биде прикажан играниот филм „Борго“ (2024, 118 мин.) во режија на Стефан Демустје, со Хафсија Херзи, Муса Мансали и Луј Меми.

Приказната ја следи Мелиса, 32-годишна искусна чуварка во затвор, која се сели на Корзика со својот сопруг и двете мали деца. За неа, ова е нов почеток и нова можност, па се вработува во тамошниот затвор – но оваа установа не е како другите. Таму затворениците се тие кои ги надгледуваат чуварите.

Вклопувањето на Мелиса во новата средина го олеснува Савериу, млад но влијателен затвореник, кој ја зема под своја закрила. Но штом излегува на слобода, повторно ќе ја побара – овој пат со барање кое не може лесно да се одбие. Оттука, сè тргнува наопаку.

„Во овој т.н. филм ноар, Стефан Демустје ги разобличува сите клишеа за Корзика. Резултатот е ремек-дело, едно од најдобрите француски филмски остварувања на годината“, напишаа француските медиуми.

Филмот ќе биде прикажан со превод (титл) на македонски јазик.