Советникот на Ред бул додава сол на раната: Сезонава титулата во Формула 1 е недостапна за Мерцедес
Хелмут Марко, специјален советник во Ред бул, по само една трка сезонава, изјави дека Луис Хамилтон и Џорџ Расел немаат никаква шанса да дојдат до главниот трофеј
Специјалниот советник на Ред бул, Хелмут Марко, верува дека титулата во Формула 1 е недостижна за Мерцедес сезонава, иако досега се одржа само една трка.
Луис Хамилтон и Џорџ Расел завршија на петтото, односно на седмото место, а нивните автомобили беа речиси секунда побавни од Ред бул на Макс Верстапен на ГН на Бахреин.
Марко, кој работи заедно со Кристијан Хорнер и главниот дизајнер Адријан Њуи во Ред бул, отфрли секаква шанса Мерцедес да ја освои титулата во 2023 година.
– Сезонава титулата во Фрмула 1 е недостапна за Мерцедес. Мерцедес нема еден проблем со концептот оваа година, туку неколку. Не успеаја да најдат решение во текот на зимата. Ќе им биде тешко: не можат да дизајнираат два или три различни автомобили. Ќе биде незгодно со буџетските ограничувања. Ниту новиот автомобил не им функционира… – вели Марко.
Верстапен го предводеше финишот еден-два за светските шампиони Ред бул во Бахреин, а Серхио Перез беше втор.