Социологот Ацески за изјавите на владиката Петар: Кога ќе се злоупотреби религијата, тоа е врв на распадот на моралните вредности
Социологот проф.-д-р Илија Ацески во изјава за „Дојче веле“ ја коментира изјавата на митрополитот на МПЦ-ОА, Петар, која предизвика многу негативни реакции во јавноста. Нови искри меѓу Црквата и граѓанското општество го продлабочија јазот којшто се отвори во однос на полемиката за родовата еднаквост и улогата на жената во општеството.
Владиката ја критикуваше идеологијата на родовата еднаквост, но и феминистичките здруженија кои, смета тој, бараат повеќе права, а не се свесни дека тие со себе носат и поголеми обврски. Митрополитот ја опиша идеологијата за родовата еднаквост како „манипулативна“, „богохулна“, „отровна“, „изопачена“ и „погубна“ и рече дека таа „молскавично му се заканува на општеството“.
„Оваа манипулативна идеологија е богохулна, противприродна и изопачена. Господ ги создаде мажот и жената, а сè друго изменето и поразлично од божјото создание е ненормално и со тоа е неприфатливо“, рече митрополитот во послание до верниците.
Политичари, граѓански активисти и научници ми порачаа на владиката Петар да си ги преиспита ставовите со кои се понижуваат и омаловажуваат жените.
„Недозволиво е ваквото мешање на Црквата во политиката и создавање конфликт со граѓанското општество, како што е недозволиво и политиката да се меша во црковните работи. Кога ќе се злоупотреби религијата – тоа е врв на распадот на моралните вредности. Меѓу другото, таков процес се случува веќе подолго време во земјата“, вели социологот и универзитетски професор Илија Ацески.
На изјавите на владиката Петар реагираше и министерката за труд и социјална политика, Јованка Тренчевска.
„Жената не бара повеќе права, бара исти права и исти можности како и мажите. „Но, владико, тоа ти со твоите ретроградни ставови, со понижувањата и омаловажувањата кон жената не можеш да го разбереш. Богохулие е отровот што го пушташ и со кој навредуваш и понижуваш 51 отсто од популацијата. Не си ги разбрал поимите, но и времето во кое живееме. Не е време на инквизиција, владико. Живееме во демократија. Во време кога можеби не секоја жена е гласна, храбра, но оние гласните и храбри се борат за родова еднаквост. За своите права и правата на секоја друга жена. За правата на секој поединец во општеството“, порача министерката.