Еден српски државјанин и двајца Хрвати загинале во сообраќајна несреќа додека бегале од рутинска контрола на полицијата, соопшти полицијата во Брауншвајг, Германија.

Полицијата соопшти дека во саботата попладне 34-годишен Србин се движел со голема брзина по федералниот автопат 4, ја изгубил контролата при престигнување, се судрил со автомобил во спротивната лента, прелетал преку оградата на мостот во близина на Брауншвајг, а потоа паднал од мост во канал, пренесува ДПА.

Возилото со минхенска регистрација исчезнало од видното поле на полицијата, која го пронашла дури кога граѓаните ја пријавиле несреќата десет минути подоцна.

Во возилото на лице место загинале и 25-годишен и 31-годишен хрватски државјанин.

Двајца Германци од Хамбург се тешко повредени во автомобилот во кој налетал Србинот, а еден од нив е во критична состојба.

Истрагата за околностите, вклучително и за мотивот на возачот за бегство од рутинската контрола, сè уште е во тек, изјави портпарол на полицијата.