Смилковски: Имаме втора шанса да се пласираме во АБА лигата
После тесниот пораз во финалната серија на АБА 2 лигата против Широки од Босна и Херцеговина, кошаркарите на ТФТ Скопје ќе имаат уште една шанса да обезбедат пласман во АБА лигата.
Препорачано
Борац Моцарт од Србија, кој ќе се бори за опстанок во АБА 1 лигата, ќе биде противникот на ТФТ Скопје.
Играчите на тренерот Боро Смилковски храбро и достојно ја претставуваат македонската кошарка оваа сезона во регионалното натпреварување.
Дефинитивно, ТФТ е еден од најпријатните изненадувања годинава, на крајот на лигашкиот дел беше седмопласиран, потоа во четвртфиналето го елиминираше фаворизираниот Златибор, а во полуфиналето триумфираше над Сутјеска.
Иако не ја искористија првата шанса за влез во елитата, кошаркарите на ТФТ ќе го дадат максимумот против Борац за остварување на целта.
– За нас овој АБА пат не е готов. Веќе следната среда започнува тоа разигрување со екипата на Борац, која што беше претпоследно пласирана од АБА 1 и тоа е некоја втора шанса што би ја имале во нашата цел да се пласираме во АБА 1 натпреварувањето – вели Смилковски.
