Словенечкиот министер за надворешни работи Анже Логар е позитивен на коронавирусот по патувањето во балтичките земји, соопшти денеска неговиот кабинет.

-Министерот Логар е позитивен по рутински тест за коронавирусот. Тој не покажува никакви симптоми на болеста, но тој и неговите најблиски соработници ќе одат во карантин 10 дена- се вели во соопштението.

Пред четири дена Логар се сретна со својот колега, министерот за надворешни рбаоти, Бујар Османи, а претходно присуствуваше на состанокот на Европскиот совет во Луксембург на 12 октомври.

Логар вчера се врати од тридневната посета на балтичките земји Летонија, Естонија и Литванија.

Логар, еден од најблиските соработници на премиерот Јанез Јанша, во октомври имаше бројни дипломатски средби во регионот, вклучително и со колеги од Словачка, Чешка и Северна Македонија.