Речиси сите граѓани на Словачка бараат пратениците и министрите во таа земја да бидат подложени на тестови за алкохол и дрога, покажало истражување на агенцијата СЦИО, објави „Правда“.

На прашањето дали би сакале политичарите да поминуваат низ истите контроли како обичните вработени, 98 отсто од испитаниците одговориле потврдно, меѓу жените 97,7 отсто, а меѓу мажите 98,3 отсто.

Лидерот на движењето „Хнутиа Словенско“, Игор Матович, во обраќање ги критикуваше коалициските пратеници поради наводна конзумација на алкохол за време на седниците.

„Колку е поважен законот, толку повеќе пијани пратеници гласаат за него. Во нормална фирма, пијан вработен веднаш би бил отпуштен“, истакна Матович и додаде дека алкохолот ја намалува внимателноста и дека пијаните пратеници не донесуваат одлуки во согласност со својата совест.

Матович нагласи и дека граѓаните на Словачка сакаат да видат политичари кои гласаат трезни кога одлучуваат за судбините на луѓето.

Анкетата била спроведена од 10 до 14 ноември, а во неа учествувале илјада полнолетни граѓани.