Новата сликовница „Штркот Гвин“ од Марина Мијаковска излезе во издание на „Едука мак“ од Скопје. Во сликовницата авторката низ сугестивна и повеќеслојна приказна ги прикажува авантурите на штркот Гвин.

Книгата е наменета за деца од училишна возраст, но и за секој читател без разлика на возраста. Во неа има дидактичка порака и едукативни елементи. Оваа сликовница е инспирирана од градот Скопје и неговото богато историско и културно наследство. Книгата ги афирмира убавините на градот Скопје и македонската култура.

Од приказната во „Штркот Гвин“ може да се научи многу за штрковите, какви птици се, колку живеат, како се хранат, зошто се преселуваат?; каков е градот Скопје? Зошто Скопје има богата култура? Штркот Гвин од Трансилванија доаѓа во Скопје како гостин, но потоа приказната има пресврт и тој од гостин станува домаќин.

Пораката на оваа книга е дека „Домот е таму каде што ти е срцето!“ Тоа е позната скопска поговорка во која се уверува и штркот Гвин што се сместува на Скопското Кале.

Целта на оваа книга на Марина Мијаковска е да го афирмира културното наследство на градот Скопје со неговите важни културни спомен обележја: Старата скопска чаршија, Камениот мост, Скопското Кале, плоштадот, итн. Текстот има богати илустрации од илустраторот Игор Јовчевски. Сликовницата може да се најде во книгоиздателството „Едука мак“.