Ф4 турнирот на машката Лига на шампионите во ракомет се отвора со голема германска пресметка помеѓу Магдебург и Фуксе Берлин денеска од 15.00 часот во Ланксес арената во Келн.

Актуелниот шампион Магдебург бара нов чекор кон одбрана на европската круна, додека Фуксе Берлин сака да се одмазди за минатогодишниот пораз во финалето.

Второто полуфинале го носи дуелот помеѓу Алборг и Барселона од 18.00 часот, судир помеѓу данската велесила и најтрофејниот клуб во историјата на натпреварувањето.

Ракометната сезона ќе го достигне својот врв со големото финале на Лигата на шампионите во Келн што ќе се игра в недела од 18.00 часот во борбата за најпрестижниот европски клупски трофеј.

Шпанскиот гигант Барселона моментно има 12 трофеи од ЛШ, за Магдебург ќе биде шести доколку остане на тронот. Фуксе Берлин лани го имаше единственото финале, додека Алборг двапати играше во финалето во 2021 и 2024 година кога двапати загуби од Барселона.