Она што се најавуваше веќе извесно време, полека станува реалност – Антоан Семењо е на чекор до потпис со Манчестер Сити.

Како што објави британскиот „Скај Спорт“ под ознаката „ексклузивно“, агентите на репрезентативецот на Гана веќе постигнале начелен договор со Манчестер Сити околу личните услови. Во наредните денови тие ќе пристигнат во Манчестер за деталите да бидат ставени на хартија и парафирани преку преддоговор.

Со тоа, „граѓаните“ практично завршија половина од работата. Сепак, останува потешкиот дел – договорот со Борнмут околу обештетувањето.

Семенјо во договорот со Борнмут има откупна клаузула од 75 милиони евра, која важи од 1 до 10 јануари, по што автоматски се брише. Англискиот клуб инсистира заинтересираните страни да ја активираат таа клаузула и веднаш да ја платат сумата, но Манчестер Сити се обидува да ја намали цената.

Клучниот адут на Сити е фактот што интересот за Семенјо е многу слаб. Освен Манчестер Сити, ниту еден друг клуб не испратил конкретна понуда до Борнмут. Челси и Тотенхем се повлекоа, додека Ливерпул и Манчестер Јунајтед сè уште се неодлучни, што дополнително ја слабее преговарачката позиција на Борнмут.

Во Манчестер Сити размислуваат за две опции – или да ја намалат сумата преку преговори, или да чекаат да истече рокот на клаузулата и потоа да преговараат под поповолни услови.

Од друга страна, Семенјо одамна го избрал Манчестер Сити, а според „Скај Спорт“, личните услови никогаш не биле проблем. Сега сè зависи од договорот меѓу двата клуба.