Преспанскиот договор јасно го регулира користењето на термините за државните институции, но употребата на придавката македонски во однос на идентитетот и народот не може да се забрани, рече денеска претседателката Гордана Сиљановска-Давкова, одговарајќи на новинарски прашања по однос на изјавата на бугарската министерка за надворешни работи, Весислава Петрова Чамова, која го употреби изразот „северномакедонски“.

Поради ова МНР вчера го повика бугарскиот амбасадор и му упати вербална протестна нота.

Претседателката денеска нагласи дека нејзиниот став кон договорот од Преспа не е променет и посочи оти „потписниците на документот треба први да инсистираат на негово доследно почитување во меѓународните односи“.

– Не се забранува, ниту пак може да се забрани употребата на придавката македонски. Впрочем тоа е и дел од самиот договор. Е сега, тие што го поддржале и што го потпишале договорот, први треба да укажуваат на неговото почитување – изјави Сиљановска-Давкова.

Осврнувајќи се на политичката клима во регионот и новата влада во Бугарија, претседателката изрази очекување за конструктивност и водење политики засновани на добра волја, нагласувајќи дека регионалното разбирање е клучно за евроинтеграцискиот пат на целиот Западен Балкан.

Во однос на прашањето за општествениот ангажман на поранешните шефови на државата, Сиљановска-Давкова рече дека нивната активност не треба да престане по завршувањето на мандатот. Таа откри дека веќе размислувала за иницијатива за нивни заеднички консултации.

– Мислам дека би било убаво да има една тркалезна маса на бивши претседатели каде што ќе може да се советуваме за состојбите со кои се соочуваме и за решенијата за определени проблеми. Инаку, во право сте дека не треба со заминувањето од функцијата да престанат и активностите, туку да продолжат – рече претседателката.

Запрашана за неодамнешните изјави поврзани со комуникацијата помеѓу премиерот и државниот јавен обвинител, Сиљановска-Давкова одби да ги коментира, нагласувајќи дека нема увид во природата на нивните телефонски разговори и дека одговорите треба да се побараат директно од инволвираните страни.