Крист Лихт, директорот на американската ТВ-мрежа „Си-ен-ен“, која е во сопственост на „Ворнер Брос“, денеска преку допис ги информирал вработените дека во тек се отпуштања во компанијата.

Лихт рекол дека „Си-ен-ен“ за тоа денеска ќе извести мал број луѓе, главно некои од своите платени соработници.

За други детали, тој вработените ќе ги информира утре попладне.

„Знам дека овие промени влијаат и на нашите колеги кои заминуваат и на оние што остануваат. Ние имаме ресурси да ве поддржиме”, напиша Лихт.

Во октомври, Лихт предупреди дека „Си-ен-ен“ ќе претрпи промени, наведувајќи ја „широката загриженост за состојбата на глобалната економија”.

Промените ќе влијаат на „луѓето, буџетите и проектите”, рече тогаш Лихт.

Кабелскиот оператор AMC Networks во вторникот соопшти дека ќе отпушти 20 отсто од својот персонал во САД бидејќи се соочува со притисоци од индустријата и тешки економски услови.