9 C
Скопје

Сеќавања, сведоштва и импресии: „Даница Ручигај: Песна над песните“ на Искра Чоловиќ и Свето Стаменов

Во издание на „Академски печат“ од Скопје од печат излезе книгата „Даница Ручигај: Песна над песните“ на Искра Чоловиќ и Свето Стаменов, новинари на Македонското радио – Радио Скопје и познати македонски публицисти. Оваа најнова книга на Чоловиќ и Стаменов е резултат нa нивното дведецениско истрајно пасионирано истражување на животот и на творештвото на првата македонска поетеса и основоположничка на т.н. женско писмо во македонската поезија и литература воопшто, Даница Ручигај, која трагично го загуби својот живот во катастрофалниот земјотрес што го погоди Скопје на 26 јули 1963 година.

Иако зад себе остави само две стихозбирки, од кои првата „Сребрени ноќни игри“ беше објавена во 1960 година, а втората „Заробеници на ветрот“ постхумно, неколку месеци по нејзината смрт во 1963 година, Даница Ручигај остави неизбришливи траги не само во современата македонска литература, туку и во македонската култура, воопшто. Зашто, таа со својот сензибилитет, некомформизам, творечка енергија и животна храброст, не помирувајќи се со патријархалните предрасуди и стереотипи за жената на овие простори, ја подотвори вратата низ која достоинствено и со дигнитет тргнаа модерните, самосвесни и еманципирани жени на македонската поезија.

Книгата „Даница Ручигај: Песна над песните“ содржи педесетина текстови – сеќавања, сведоштва и импресии на 35 нејзини содружници, пријатели, познаници, современици, но и наследници и следбеници, како академиците Матеја Матевски и Радован Павловски, потоа на Елена Бендевска, Битрица Миркуловска, Миле Попов, Нико Този, Коста Балабанов, Евгенија Шуплинова, Гордана Михаилова-Бошнакоска, Михо Атанасовски, Коле Чашуле, Светлана Христова-Јоциќ, Звонко Стојановиќ, Иван Чаповски, Александар Ежов, Бранко Варошлија, Васил Тоциновски, Виолета Христовска, Људмил Спасов, Александар Прокопиев, Ристо Јачев, Кристина Николовска, Милан Јазбец и др. Рецензенти на книгата се проф. д-р Васил Тоциновски и проф. д-р Милан Јазбец, поранешен амбасадор на Република Словенија во Република Северна Македонија и познат словенечки писател и поет, а нејзиното излегување е овозможено со финансиски средства на Министерството за култура на РСМ.

Инаку, Искра Чоловиќ и Свето Стаменов се автори и на книгите посветени на првата македонска поетеса „Лебедовата песна на Заробеничката на ветрот“ (2016), „Ако влегуваш во овој храм во кој љубовта е вера, помоли се!“ (2017) и „Лабудова песна Заробљенице ветра“ (2019), како и на антологијата на песни посветени на Даница Ручигај „Недореченост, о проклета да си“ (2018), а беа приредувачи и на книгата на Даница Ручигај „Сребрени ноќни игри и Заробеници на ветрот“, која беше објавена во 2003 година по повод 40-годишнината од нејзината трагична смрт во скопскиот земјотрес.

(Текстот е објавен во „Културен печат“ број 57, во печатеното издание на „Слободен печат“ на 21-22 ноември 2020)

Поврзани вести

Изложба „Екс либрис Скопје“: Будење на креативниот импулс со графички минијатури

Тони Димков

Научна фантастика: Објавен е романот „Едем“ од Станислав Лем

Тони Димков

Мултикултурен зборник: Литературно шаренило на Балканот

Тони Димков

Ретроспектива на Кинотеката за 2020: Година што, сепак, „не ја изедоа скакулците“

Тони Димков

Антологија: Кратки книжевни форми на три јазици

Тони Димков

Филхармонија: Музиката го враќа достоинството на човештвото

Тони Димков

Остави Коментар