Започна реконструкција на живеалиштата на животните во првиот реон во Зоолошката градината, која ЗОО Скопје ја изведува со поддршка од Град Скопје.

Согласно сите мерки за благосостојба, во оние живеалишта каде што постоеше потенцијална зараза на животни во иднина, а со цел заштита, со целосна механизација беше изваден слој на земја во длабочина од 15-20 цм. По овој зафат, беше ставена нова подлога со тампон, кој служи само како дренажа. По тампонот, следува третата фаза во која деновиве ќе се постават природни материјали и земја во сите живеалишта – информираа од Зоолошка градина.

Оттаму додаваат дека покрај тоа е направена и целосна дезинфекција на внатрешните и надворешните делови на живеалиштата, а набрзо ќе започне и реконструкција на оградите и сите делови кои имаат потреба од модернизирање.

По завршувањето на обновувањето на живеалиштата во првиот реон, ќе се продолжи и во останатиот дел од градината.

Нашата визија е Зоолошка градина Скопје да стане модерен зоо центар за заштита на природата и со хуман третман и услови за секое животно, велат од ЗОО Скопје.