Се намалува бројот на основци и средношколци во земјава
Во учебната 2022/2023 година забележано е намалување на бројот на ученици во редовните основни и средни училишта во однос на претходната учебна година, покажуваат податоците од Државниот завод за статистика.
Бројот на ученици во основните училишта изнесува 185.099, што е намалување за 0,8 отсто. Во средните училишта регистрирани се 69.227 ученици, што претставува намалување за 2,5 проценти во однос на претходната учебна година.
Само во првото полугодие од прилепските училишта се испишале околу 130 ученици и со нивните родители заминале во странство.
Во последните четири месеци, 200 ученици или околу седум цели одделенија од тетовските средни и основни училишта се иселиле во странство.
И Куманово не е одминато од трендот на иселување од државата, што може да се види од бројот на запишани ученици. Во учебната 2020/2021 година во средните училишта во градот имало 4.508 ученици, годинава таа бројка изнесува 4.126 ученици. Слична е состојбата и во кумановските основни училишта. Минатата учебна година биле запишани 1.208 ученици, а во 2022/2023 година запишани се 1.070 ученици.