Сашко Николов од денеска и официјално е новиот градоначалник на Штип

Новиот градоначалник на Општина Штип, Сашко Николов денеска го доби уверението од членовите на Општинската изборна комисија. На предвремените избори за градоначалник на Штип, што се одржаа на 13 декември, за Николов гласаа 11.477 граѓани и тој беше избран во првиот круг. Советниците на ВМРО-ДПМНЕ не присуствуваа на доделувањето на уверението.

– Сакам да се заблагодарам на сите мои сограѓани кои на 13 декември го дадоа својот глас. Ветувам дека ќе продолжиме да работиме за интересот на граѓаните и Општина Штип ќе се движи по вистинскиот пат, ќе работиме на реализација на ветените проекти во мојата изборна програма, рече Николов.

Тој истакна дека првото нешто што ќе го направи е создавање на фонд за обезбедување на маски за секој граѓанин на општината, а утре го има првиот работен ден со раководителите и директорите на институциите, кои се под ингеренции на локалната власт. Николов наследува финансиски стабилна општина, засега не најавува смена на директори или раководители, но како што вели им дава рок од два месеца да се прилагодат на неговото темпо на работа.

Вршителот на должност градоначалник на Општина Штип, Јане Миланов во своето обаќање му честиташе на својот наследник Николов и му посака успешен мандат со многу нови проекти.

– Сакам да му порачам на градоначалникот дека му стојам на располагање и јас и колегите советници во следните предизвици. Да се заблагодарам за досегашната поддршка која несебично ми ја дававте, рече Миланов.

Николов денеска седна и во градоначалничката фотеља, при што се запозна и се информираше за работата на членовите на Кабинетот на градоначалникот на Општина Штип. Новиот градоначалник има мандат до редовните локални избори во 2021 година или неполни десет месеци.

Николов и Миланов на граѓаните на Штип им ги честитаа новогодишните празници со желби за многу здравје, среќа и љубов.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот