Основните елементи вградени во делата на Тамара Забазноска се клинци, медијапан, чекан, голема доза апсорбирани знаења и многу фантазија. Нејзиниот уметнички израз е прецизен и геометриски, претставен преку заедништво на елементите што сугерираат дека секоја идна точка/акција е резултат на сите претходни точки и акции.

– Поттикната од тајните што ги содржи природата во корелација со новите научни истражувања, опусот на изложбата е базиран врз науката и знаењата, насловен „Натура“ – љубовта кон природата во сите нејзини манифестации, од најмалиот организам до црвениот гигант, кој лебди во Универзумот, и Човекот и неговиот сензибилитет.

Со „Натура“ доаѓа љубопитноста, поривот да се истражат и откријат местата каде човекот се среќава преку природата со себе. И додека ги користиме сетилата за да изразиме делови од нас кои се скриени, така може да користиме и различни елементи за да го направиме видлив оној дел од природниот невидлив свет. Преку опусот правам синтеза помеѓу универзалното и микроскопското, силите кои ги брануваат длабочините на човечкото битие и Природата, која крие тајни и нуди одговори. Можеме да ги примениме нејзините тајни и да ги прочитаме одговорите преку нови откритија како основа за нашата иднина – открива Забазноска.

Авторката Тамара Забазноска (1987, Скопје) е интердисциплинарен уметник и архитект. Првите знаења ги стекнува преку енциклопедиите и бајките, за понатаму да го насочи својот интерес кон математиката, геометријата и релациите во просторот преку Архитектонскиот факултет, кој го завршува 2011 година.

Потребата за истражување, желбата за изразување на природните сили, новите научни знаења и учења се постојан поттик за репрезентација на шемите во микро и макро светот на природата и човекот, кои ги опфаќа преку магистерскиот труд на тема „Архитектурата во природата и Природата во архитектурата“ во 2018 година, како и низ делата на композитно дрво создадени од клинци, конец и стакла.