Американската Администрација за храна и лекови (ФДА) вчера одобри лек за слабеење на американската компанија „Ели Лили“. ФДА го одобри тирзепатид за продажба под името zepbound на возрасни со индекс на телесна маса (БМИ) од најмалку 30 или 27, доколку пациентот има и друга здравствена состојба поврзана со тежината, како што е болест на срцето.

„Дебелината и прекумерната тежина се сериозни состојби кои можат да се поврзат со некои од водечките причини за смрт, како што се болестите на срцето, мозочниот удар и дијабетесот“, рече во изјавата Џон Шаретс, директор на Центарот за истражување и проценка на лекови при ФДА.

Тирзепатид е веќе одобрен под трговското име mounjaro за дијабетес тип 2, и сè повеќе се користел за губење на тежината пред официјалното одобрение од Администрацијата за храна и лекови.