САД очекуваат реформи во палестинската управа
Соединетите Американски Држави го поздравија формирањето на нова влада на палестинската управа – гледајќи на тоа како чекор кон политички реформи.
Администрацијата на Џо Бајден повика на „ревитализација“ на палестинската управа со седиште на Западниот Брег со надеж дека ќе може да управува со појасот Газа откако ќе заврши војната меѓу Израел и палестинската група Хамас.
Портпаролот на американскиот Стејт департмент Метју Милер рече дека Соединетите Држави со нетрпение очекуваат да работат со новата група министри „за спроведување на веродостојни реформи“.
„Ревитализираната палестинска управа е од суштинско значење за постигнување резултати за палестинскиот народ и на Западниот Брег и на Газа и за воспоставување услови за стабилност во поширокиот регион“, рече Милер.
Палестинските власти управуваат со делови од Западниот Брег окупирани од Израел. На чело е палестинскиот претседател Махмуд Абас, кој не се соочи со избори речиси две децении.