Откако американскиот претседател Доналд Трамп на прес конференција, зборувајќи за ликвидирањето на лидерот на терористичката Исламска држава Абу Бакр ал-Багдади ја спомна Русија, со изјава се јави и руското Министерство за одбрана, кое демантираше дека знаат нешто за помош на американското воздухопловство.

– Не знаеме ништо за каква било помош на американските авиони во воздушниот простор на Идлиб за целите на операцијата – рече портпаролот на Министерството, Игор Конашенков.

На прес-конференцијата по повод ликвидацијата на терористичкиот лидер, Трамп рече дека Русија на американските авиони им го отворила воздушниот простор кој го контролира над сириските територии.

Конашенков објасни и какво влијание ќе има на ситуацијата во Сирија убиството на Ал Багдади:

– Откако ИД беше поразена од страна на силите на сириската Влада и со поддршка на руските воздушни сили на почетокот на 2018 година, уште една смрт на Абу Бакр ал-Багдади нема да има влијание ниту на ситуацијата во Сирија, ниту на акциите на терористите кои останаа во Идлиб, рече Конашенков.